కృపాసముద్రం సుముఖం త్రినేత్రం
జటాధరం పార్వతివామభాగం ।
సదాశివం రుద్రమనన్తరూపం
చిదంబరేశం హృది భావయామి II 1 II
వచామతీతం ఫణిభూషితాఙ్గం
గణేశతాతం ధనదస్య మిత్రమ్ ।
కందర్పనాశం కమలోత్పలాక్షం
చిదంబరేశం హృది భావయామి II 2 II
రమేశవన్ద్యం రాజతాద్రినాథం
శ్రీవామదేవం భవదుఃఖనాశమ్ ।
రక్షాకరం రాక్షసపీడితానాం
చిదంబరేశం హృది భావయామి II 3 II
దేవాధిదేవం జగదేకనాథం
దేవేశవన్ద్యం శశిగన్ధచూడమ్ ।
గౌరీసమేతం కృతవిఘ్నదక్షం
చిదంబరేశం హృది భావయామి II 4 II
వేదాన్తవేద్యం సురవైరివిఘ్నం
శుభప్రదం భక్తిమదన్తరాణామ్ ।
కాలాన్తకం శ్రీకరుణాకటాక్షం
చిదంబరేశం హృది భావయామి II 5 II
హేమాద్రిచాపం త్రిగుణాత్మభావం
గుహాత్మజం వ్యాఘ్రపురీశమాద్యమ్ ।
స్మశానవాసం వృషవాహనాథం
చిదంబరేశం హృది భావయామి II 6 II
ఆద్యన్తశూన్యం త్రిపురారిమీశం
నందీశముఖ్య స్తుతి వైభవాద్యమ్ ।
సమస్తదేవైః పరిపూజితాంఘ్రిం
చిదంబరేశం హృది భావయామి II 7 II
తమేవ భాన్తం హ్యనుభూతిసర్వం
అనేకరూపం పరమార్థమేకమ్ ।
పినాకపాణిం భవనాశహేతుం
చిదంబరేశం హృది భావయామి II 8 II
విశ్వేశ్వరం నిత్యమనన్తమాద్యం
త్రిలోచనం చంద్రకళావతంసం ।
పతిం పశూనాం హృది సన్నివిష్టం
చిదంబరేశం హృది భావయామి II 9 II
విశ్వాధికం విష్ణుముఖైరూపాస్యం
త్రిలోచనం పఞ్చముఖం ప్రసన్నమ్ ।
ఉమాపతిం పాపహరం ప్రశాన్తం
చిదంబరేశం హృది భావయామి II 10 II
కర్పూరగాత్రం కమనీయనేత్రం
కంసారిమిత్రం కమలేన్దువక్త్రమ్ ।
కన్దర్పగాత్రం కమలేశమిత్రం
చిదంబరేశం హృది భావయామి II 11 II
విశాలనేత్రం పరిపూర్ణగాత్రం
గౌరీకలత్రం హరిదమ్బరేశమ్ ।
కుబేరమిత్రం జగతః పవిత్రం
చిదంబరేశం హృది భావయామి II 12 II
కళ్యాణమూర్తిం కనకాద్రిచాపం
కాన్తాసమాక్రాన్త నిజార్ధదేహమ్ ।
కపర్దినం కామరిపుం పురారిం
చిదంబరేశం హృది భావయామి II 13 II
కల్పాన్తకాలాహిత చణ్డనృత్తం
సమస్తవేదాన్తం వచో నిగూఢమ్ ।
అయుగ్మనేత్రం గిరిజాసహాయం
చిదంబరేశం హృది భావయామి II 14 II
దిగమ్బరం శాఙ్ఖసితాల్పహాసం
కపాలినం శూలినమప్రమేయమ్ ।
నగాత్మజా వక్త్రపయోజసూర్యం
చిదంబరేశం హృది భావయామి II 15 II
సదాశివం సత్పురుషైరనేకైః
సదార్చితం సామశిరస్సుగీతమ్ ।
వ్యాఘ్రచర్మామ్బర ముగ్రమీశం
చిదంబరేశం హృది భావయామి II 16 II
చిదంబరేశస్య స్తవం పఠేద్యః
ప్రదోషకాలేషు పుమాన్ స ధన్యః ।
భోగానశేషాననుభూయ భూయః
సాయుజ్యమప్యేతి చిదంబరస్య II 17 II
