గోపాలస్తుతీ ॥
శ్రీ గణేశాయ నమః ।
ఓం నమో విశ్వరూపాయ విశ్వస్థిత్యన్తహేతవే ।
విశ్వేశ్వరాయ విశ్వాయ గోవిన్దాయ నమో నమః ॥ ౧॥
నమో విజ్ఞానరూపాయ పరమానన్దరూపిణే ।
కృష్ణాయ గోపీనాథాయ గోవిన్దాయ నమో నమః ॥ ౨॥
నమః కమలనేత్రాయ నమః కమలమాలినే ।
నమః కమలనాభాయ కమలాపతయే నమః ॥ ౩॥
బర్హాపీడాభిరామాయ రామాయాకుణ్ఠమేధసే ।
రమామానసహంసాయ గోవిన్దాయ నమో నమః ॥ ౪॥
కంసవశవినాశాయ కేశిచాణూరఘాతినే ।
కాలిన్దీకూలలీలాయ లోలకుణ్డలధారిణే ॥ ౫॥
వృషభధ్వజవన్ద్యాయ పార్థసారథయే నమః ।
వేణువాదనశీలాయ గోపాలాయాహిమర్దినే ॥ ౬॥
బల్లవీవదనామ్భోజమాలినే నృత్యశాలినే ।
నమః ప్రణతపాలాయ శ్రీకృష్ణాయ నమో నమః ॥ ౭॥
నమః పాపప్రణాశాయ గోవర్ధనధరాయ చ ।
పూతనాజీవితాన్తాయ తృణావర్తాసుహారిణే ॥ ౮॥
నిష్కలాయ విమోహాయ శుద్ధాయాశుద్ధవైరిణే ।
అద్వితీయాయ మహతే శ్రీకృష్ణాయ నమో నమః ॥ ౯॥
ప్రసీద పరమానన్ద ప్రసీద పరమేశ్వర ।
ఆధివ్యాధిభుజఙ్గేన దష్టం మాముద్ధర ప్రభో ॥ ౧౦॥
శ్రీకృష్ణ రుక్మిణీకాన్త గోపీజనమనోహర ।
సంసారసాగరే మగ్నం మాముద్ధర జగద్గురో ॥ ౧౧॥
కేశవ క్లేశహరణ నారాయణ జనార్దన ।
గోవిన్ద పరమానన్ద మాం సముద్ధర మాధవ ॥ ౧౨॥
॥ ఇత్యాథర్వణే గోపాలతాపిన్యుపనిషదన్తర్గతా గోపాలస్తుతి సమాప్తా ॥
